وزیر اعلیٰ پنجاب نے سخت نوٹس لے لیا، صوبائی وزیر صحت عمران نذیر نے کمالیہ کا ہنگامی دورہ کیا۔
سی سی ٹی وی فوٹیج مریضوں اور لواحقین کے بیانات قلمبند کیے اور ہسپتال انتظامیہ سے تفصیلی بریفنگ لی گئی۔
کمالیہ (ایڈیٹر نئی آواز ۔ ڈاکٹر غلام مرتضیٰ) تحصیل ہیڈ کوارٹر ہسپتال کمالیہ میں 7 سالہ اثمارہ کی مبینہ طور پر غلط انجکشن لگنے سے ہلاکت کے واقعے پر وزیر اعلیٰ پنجاب مریم نواز شریف نے سخت نوٹس لے لیا۔ وزیر اعلیٰ کی ہدایت پر صوبائی وزیر صحت خواجہ عمران نذیر نے کمالیہ کا ہنگامی دورہ کیا اور ہسپتال میں سہولیات ، انتظامات اور واقعے کی تحقیقات کا جائزہ لیا۔ وزیر اعلیٰ مریم نواز شریف نے بچیّ کی ہلاکت پر گہرے رنج وغم کا اظہار کرتے ہوئے کہا کہ ذمہ داروں کو ہر صورت نشان عبرت بنایا جائے گا تا کہ آئندہ ایسے واقعات پیش نہ آئیں۔ انہوں نے فوری تحقیقات کا حکم دیتے ہوئے صوبائی وزیر صحت کو ہسپتال پہنچ کر معاملے کی مکمل جانچ کی ہدایت کی۔ وزیر صحت خواجہ عمران نذیر نے ہسپتال میں پہنچ کر سی سی ٹی وی فوٹیج دیکھی، مریضوں اور لواحقین کے بیانات قلمبند کیے اور ہسپتال انتظامیہ سے تفصیلی بریفنگ لی۔ انہوں نے ہسپتال میں علاج معالجے کی سہولیات، ایمرجنسی وارڈ اور ادویات کی دستیابی کا بھی معائنہ کیا۔ وزیر صحت خواجہ عمران نذیر جاں بحق بچیّ کے گھر بھی گئے اور اہل خانہ سے تعزیت کی۔ انہوں نے کہا کہ وزیر اعلیٰ پنجاب مریم نواز شریف خود اس واقعے پر انتہائی افسردہ ہیں۔ اور انہوں نے واضح ہدایات دی ہیں کہ انصاف ہر صورت یقینی بنایا جائے گا۔ ابتدائی تحقیقات کی روشنی میں وزیر صحت نے بڑی کاروائی کرتے ہوئے سی ای او ہیلتھ ڈاکٹر کاشف محمود کمبوہ، ایم ایس تحصیل ہیڈ کواٹر ہسپتال اور چیف فارماسسٹ کو عہدوں سے بر طرف کر دیا۔ مزید کارروائی کے لیے ایک اعلیٰ سطحی انکوائری کمیٹی بھی قائم کردی گئی ہے جو اپنی رپورٹ پیش کرے گی۔ جس کے بعد ذمہ داروں کیخلاف سخت کاروائی کی جائے گی۔ وزیر صحت نے ہسپتال میں مریضوں کو مفت ادویات نہ ملنے کی شکایات کا سخت نوٹس لیتے ہوئے کہا کہ یہ پہلا سرکاری ہسپتال ہے جہاں ایسی شکایات سامنے آئی ہیں اس کا مکمل آڈٹ کیا جائے گا۔ انہوں نے تین ماہ کے ریفرل کیسز اور چھ ماہ کے میڈیسن ریکارڈ کی جانچ کا حکم بھی دیا تاکہ کسی بھی قسم کی بے ضابطگیوں کا پتہ چلایا جا سکے۔ وزیر صحت نے کہا کہ وزیر اعلیٰ پنجاب مریم نواز شریف کے صحت دوست ویژن کے مطابق تمام سرکاری ہسپتالوں میں مریضوں کو مفت ادویات کی فراہمی یقینی بنائی جا رہی ہے۔ اگر کسی بھی ہسپتال میں اس حوالے سے کوتاہی یا بد عنوانی ثابت ہوئی تو سخت ایکشن لیا جائے گا۔ صوبائی وزیر صحت کے ہمراہ ڈپٹی کمشن ٹوبہ ٹیک سنگھ محمد نعیم سندھو، اسسٹنٹ کمشنر کمالیہ اقرا ناصر اور 7 رکنی ٹیکنیکل ٹیم بھی موجود تھی۔ جنہوں نے ہسپتال کے مختلف شعبوں کا جائزہ لیا اور اپنی رپورٹ مرتب کی۔ وزیر صحت نے ہسپتال انتظامیہ کو سختی سے ہدایت کی کہ مریضوں کو ہر ممکن طبی سہولیات فراہم کی جائیں اور کسی بھی قسم کی غفلت یا لاپرواہی برداشت نہیں کی جائے گی۔انہوں نے واضح کیا کہ مریضوں کی صحت سے کھیلنے والوں کے خلاف سخت کارروائی عمل میں لائی جائے گی۔ وزیر صحت خواجہ عمران نذیر نے کہا کہ حکومت پنجاب کسی بھی صورت عوام کیساتھ زیادتی برداشت نہیں کریگی، اور مریضوں کے حقوق کا ہر حال میں تحفظ کیا جائیگا۔ انہوں نے یقین دہانی کرائی کہ اس واقعے کے تمام ذمہ داروں کو قانون کے مطابق سخت ترین سزا دی جائے گی تا کہ آئندہ ایسے واقعات کی روک تھام کی جاسکے۔